ما يطيّح الرّطل كان الكيلو أمّا الفخّار موش ديما يكسّر بعضو.
النهضة تعرف اللّي حزب نداء تونس متاع الباجي والشلّة القديمة هو الخطر الصّحيح على خاطر كان ما خلاّهاش التجمّع تعمل اللّي تحبّ في إنتخابات 23 أكتوبر 2011 من المستحيل أنّها تجيب النتيجة متاع 40 بالمائة.
النهضة توّا عندها منافس صحيح ياسر في الإنتخابات القادمة ونتصوّرها باش تلقى معاه حلّ باش تقسم معاه وتضمن لروحها مكانة محترمة في السلطة.
يقول القايل زعمة نوصلو لموعد الإنتخابات الجايّة بلاش مشاكل ؟ يا ذنوبي كن تصير حاجة من أيّ جهة سياسية كانت لأنّو الشعب التونسي بخيل وما عندوش نفس طويل وموش في طبيعتو أنّو يقعد مُعرّض لوضعيّة متأزّمة لمدّة طويلة : بالعربي يقلق ليه ليه ويرمي روحو على أسهل حلّ .
وفي هذا الإطار باش يلوّح الشعب روحو في أحضان بابا الباجي يحييه للخضراء.
أمّا ماهو بابا الباجي موش البارح في الأيام خرج للشارع, لذا فبحيث يعرف منين تتّاكل لحمة الإنتخابات وباش يشرط على النهضة إذا كان لقى معاها مفاهمة أنّها تعمل قانون إنتخابات وتعيّن هيئة إشراف على الإنتخابات يرضى عليهم بابا الباجي.
إذا النهضة تكمّل في العنطزة متاعها ما نستغربوش أنّو التجمّع (وهوني نقولها بالفمّ والملى) يقلب عليها الطّاولة على قاعدة وتشنع البلاد خاطر الناس تغلي وكي تلقى ماكينة التجمّع بكامل أسطولها هبطت تكوّر يولّي حتّى هو يزدم للشارع وخلّي ترصّي وين ترصّي.
أمّا ماهو هي سياسة موش تمخوير, لذا نتصوّر النهضة باش ترخّ وتقبل اللعبة مع التجمّع وإلاّ فإنّها بوجاديّة ياسر ومشى في بالها بالرسمي اللّي البلاد تحت صبّاطها.
بالطبيعة ما ننساوش الإتحاد العام التونسي للشغل اللّي طيّح بن عليّ واللّي قادر باش يطيّح 100 منّو .
الكورة عند النهضة وعينها ميزانها وكيف ما قلت اللعبة الكلّها في القانون الإنتخابي وشكون باش يشرف على الإنتخابات و من غير ما نحكي على قانون منع التجمّعيين من الترشّح للإنتخابات الجايّة خاطر حكاية ما ثمّاش منها واقعيّا من جهة النهضة لأنّها كان باش تحلّ الباب هذا عبارة على حفرت قبرها بيديها.
ونقعد أنا وحثالة المستقلّين اللّي كيفي في آخر حلقة بين الكوشة والكذا شيئ متاع الكوّاش ...
Articles
برجولية قيس تحليل هبال يجمع ما بين الموازي والخلافي وسيرتو الخلافي!!!